- Поларните мечки можат да се најдат во ледените пространства на Арктикот, во Канада, Алјаска (САД), Гренланд, Русија и Норвешка.
- Ова се навистина големи мечки, друштво. Возрасните поларни мечки можат да достигнат должина од над 2,5 метри и да тежат околу 680 килограми. Нивната огромна големина и тежина ги прават најголемите живи месојадни животни на Земјата!
- Поларните мечки се добро приспособени за преживување во една од најсуровите средини на нашата планета. Освен густото крзно, тие имаат слој масно ткиво, наречено „сало,“ кое ги изолира (штити) нивните тела од студениот воздух и речиси замрзнатата вода. Поларните мечки исто така имаат црна кожа под нивното сјајно крзно, што им помага да ги впијат сончевите зраци и да се загреат.
- Овие величествени цицачи имаат неверојатно чувство за мирис кое го користат за да ја следат нивната омилена храна, фоките. Всушност, нивното чувство за мирис е толку силно што можат да откријат плен на далечина од 16 километри!
- И покрај нивната големина и тежина, поларните мечки се одлични пливачи и биле забележани во води на повеќе од 100 км од брегот. Тие можат да пливаат удобно со брзина од околу 10 км/ч, користејќи ги своите широки шепи (кои имаат околу 30 сантиметри и мали мембрани) како весла во водата.
- Иако се добри пливачи, поларните мечки не се доволно брзи за постојано да фаќаат фоки во отворени води. Наместо тоа, тие се потпираат на мразот како платформа за лов. Чекаат во близина на дупките за дишење на фоките или на работ од мразот додека фоката не излезе на површината. Потоа ја зграпчуваат од морето и… голт!
- Дали знаевте дека крзното на поларната мечка не е бело? Всушност, тоа е проѕирно со шуплива срцевина која ја рефлектира светлината. Ова им помага на мечките да се маскираат во нивната околина – корисен трик, особено при лов на внимателни фоки!
- Женските поларни мечки ги раѓаат своите младенчиња во снежни јами (во ноември или декември), каде што семејството е заштитено од суровата арктичка средина. При раѓање, младенчињата се долги околу 30 сантиметри и тежат околу половина килограм – што е отприлика исто како морско прасе!
- Поларното семејство излегува од дувлото четири или пет месеци подоцна. Младенчињата ќе останат со нивната мајка околу две години и за тоа време ќе ги научат вештините што им се потребни да преживеат на Арктикот.
- За жал, овие неверојатни животни се загрозени. Најголемата опасност за поларните мечки се климатските промени. Покачувањето на глобалните температури значи дека морскиот мраз се топи порани и се формира подоцна секоја година, оставајќи им на поларните мечки помалку време да ловат храна.
е-Списание „Чудна шума“ 
Напишете коментар