од Владимир Лукаш

---

Што ли знаеме за китон

што спие мирно ко питон?

Појадува меки бонбони

од медузи, алги и планктони

пие мориња и океани,

долг е од утре до лани,

тежок е колку 10 автобуси,

нозе има ко на змија куси

и во очите може да смести

јато риби што се мрестат. 

А дали китот видел чивава

како јава врз глава на крава?

Видел тој и почудни нешта:

ништа маскирани во сешта

што жонглираат со фоки вешто,

слон со сурла толку малечка

на која се смее дури и Палечка,

дожд што се плаши од вода,

риба и жирафа што пеат ода

и болва што го чека Годо.

Не буди го китов заспан

– саска ко питон кога е ненаспан.

Не нуди го со манго ил банани

– ќе те збрка на сите страни.

Остави го да спие и да сонува

во оазата на пустината сува,

дур ветре свежо нежно му дува.

---

Од книгата „Пу за Мите, пу за сите“ во издание на Чудна шума.

---