Медуза в сина блуза

од Владимир Лукаш

Една ретка медуза
во сина свилена блуза
низ длабочини си шетка,
низ струи си летка.

Мозок нема, а не ѝ ни треба,
умна е ко невидлива амеба,
побрза од сунѓер морски,
постара од столб дорски.

Си јаде планктони,
крцкави ларви на тони,
боцкави ракчиња црвени
и мали играчки дрвени.

Си легнува врз алги меки,
ја масираат подземни реки,
си сонува авантури бројни
низ коралите стобојни.