од Владимир Лукаш

---

Внатре-вон, внатре-вон

– скокал на порта еден муфлон.

„Сешто!” – си помислил кондураџијата слон

што ковал црн излитен ѓон.

Сè и Што спокојно си шеткале,

дур вилински коњчиња си леткале.

Си леткале и ковале планови смели,

зелените лисја да ги сторат бели.

Зелените лисја се побуниле

и боите в револт заѕуниле,

пуштиле низ шума шарени летоци,

на кои пишувало: „Ги укинуваме сите петоци!”

„Како ќе нè укинете?” – прашале петоците

и на лисјата им ги саснале пците.

Лисјата се разбегале на сите страни,

ко да ги бркаат лути пирани,

се сокриле в есен рана

и чекале да си паднат.

А муфлонот си скокал ли си скокал,

ожеднел и цел бокал локнал,

слонот го гледал, си помислил „Сешто!”

и продолжил чевли да поправа вешто.

---

Од книгата „Пу за Мите, пу за сите“ во издание на Чудна шума.

---